| مقام های افغانستان و تاجیکستان با هدف گسترش همکاریهای بیشتر اقتصادی و تجاری میان دو کشور تفاهمنامه همکاری تجاری امضا کردند. به گزارش خبرگزاری جمهور؛ ششمین تفاهمنامه تجاری میان افغانستان و تاجیکستان امروز جمعه (۵ جوزا) میان وزیر اقتصاد افغانستان و وزیر حمل و نقل تاجیکستان، در کابل به امضا رسید.عبدالستار مراد وزیر اقتصاد کشور در این مراسم گفت که سطح مبادلات تجاری میان تاجیکستان و افغانستان در یک سال گذشته دو برابر شده است.آقای مراد بیان داشت که در تفاهمنامه ای که امروز دو کشور امضا کرده اند، توافق شده که در زمینه انرژی، نفت و گاز، آب، حمل و نقل، گمرک، مخابرات، مسایل فرهنگی و آموزش کارمندان دولتی افغانستان با هم بیشتر همکاری کنند.خدایار خدایارزاده، وزیر حمل و نقل تاجیکستان در مراسم امضا این پروتکل گفت که اجرای برنامه انتقال انرژی آسیای میانه به جنوب آسیا (کاسا ۱۰۰۰) و ساخت خط آهن میان چین - قیرقیزستان - تاجیکستان -افغانستان -ایران و همچنین ساخت خط آهن تاجیکستان، افغانستان و ترکمنستان میتواند به توسعه افغانستان شتاب بیشتر بدهد.آقای خدایار زاده گفت که افغانستان و تاجیکستان که کشورهای محصور در خشکی هستند و به آبهای آزاد راه ندارند، ساخت این راهها میتواند این دو کشور را کمک کند.وزیر حمل و نقل تاجیکستان گفت که اکنون دوشنبه از صادر کنندگان عمده سیمان و برق به افغانستان است.خبرگزاری جمهور- کابل |  |
↧
افغانستان و تاجیکستان تفاهمنامه تجاری امضا کردند
↧
