اوزبیکستان: هواپیماهای حکومت پیشین افغانستان را به طالبان نمی‌دهیم

مقام‌های اوزبیکستانی می‌گویند که ده‌ها هواپیمای ارتش حکومت پیشین افغانستان را که پس از سقوط کابل به آن کشور انتقال داده شده، به طالبان نمی‌دهد. به گزارش خبرگزاری جمهور؛ عصمت‌الله ارگاشف نماینده ویژه اوزبیکستان در امور افغانستان به صدای امریکا گفته است که این هواپیماها متعلق به امریکا است و به کابل باز نخواهند گشت. او افزوده است: "دولت ایالات متحده هزینه‌ی آنها (هواپیماها) را پرداخته است. دولت [ ایالات متحده] دولت پیشین افغانستان را تمویل می‌کرد و بنابرین ما معتقدیم که این کاملاً به واشنگتن بستگی دارد که با آنها چه می‌کند." این دیپلمات اوزبیکستانی گفته است که کشورش این تجهیزات نظامی را در توافق با ایالات متحده نگه داشته است. مقام‌های دفاعی امریکا نیز به صدای امریکا تایید کرده‌اند که ازبیکستان و تاجیکستان هیچ برنامه‌ای برای تحویل هواپیماهای حکومت پیشین افغانستان به طالبان ندارند. راب لودویک، یک سخن‌گوی وزارت دفاع امریکا گفته است: "این هواپیما‌ها موضوع همکار امنیتی منطقه‌ای با دولت های ازبیکستان و تاجیکستان است." او افزوده است که 46 هواپیما در اوزبیکستان و 18 هواپیما در تاجیکستان وجود دارد.  به گفته او، این هواپیماها شامل چرخبال‌های Mi-17 UH-60 و همچنین هواپیمای بال ثابت PC-12، C-208، AC-208 و A-29 است. گفتنی است که در این هواپیماها در اوسط ماه‌ آگیست، شماری از نیروهای هوایی همراه با اعضای خانواده‌های‌شان چند ساعت قبل از سقوط کابل به‌دست طالبان، به ازبیکستان و تاجیکستان فرار کرده‌اند. مقام‌های امریکایی تا کنون درباره‌ی سرنوشت هواپیماها تصمیم نگرفته‌اند. طالبان این تجهیزات را دارایی عامه می‌دانند و بارها از حکومت‌های تاجیکستان و ازبیکستان خواسته‌اند که آنها را بازگردانند. پیش از این ملا محمد یعقوب، سرپرست وزارت دفاع طالبان حتا باری به تاجیکستان و ازبیکستان گفته بود که هیچ کشوری حق ندارد که هواپیماهای افغانستان را نزد خود نگهدارد یا از آن استفاده کند. او هشدار داده بود که این کشورها نباید صبر افغانستان را آزمایش کنند و مجبور نسازد به عمل مشابه اقدام شود. خبرگزاری جمهور- کابل